AFFIES - KOSHUIS VS DORP 2016

Die wedstryd vind more om 14:00 plaas met die hokkie wedstryd direk daarna.

Die koshuis/dorp wedstryd is vir die eerste keer in 1989 gespeel

Die idee vir ‘n koshuis/dorp wedstryd het in 1989 sy ontstaan gehad in die koshuis. Ek haal die Koshuis Hoofseun (Pieter Cillie) aan.

Die wedstryd het ontstaan agv ledigheid dink ek. Die rugby seisoen was klaar maar ons het nog nie genoeg van rugby gehad nie en ons het enige verskoning gebruik om die seisoen verder uit te rek.
Die "hoge lui" was nie baie te vinde vir NOG rugby nie en die eindeksamen was oppad, asook die Direkteurstrofee uitspeel wedstryde.  Ek het met Mnr Chris Kruger gepraat (afrigter van die 1e span) en hy was bereid om die skeidsregter te wees indien ek die hoof, Mnr Tjaart Kruger se toestemming kon kry. Ek het met dieselfde storie na die Hoof toe gegaan en verduidelik dat Mnr Chris Kruger baie te vinde is vir die wedstryd indien hy, Tjaart Kruger dit sou toelaat.
So het dit dan gebeur, maar die hele ding was half as n weeskind gehanteer en dis heel moontlik hoekom daar geen of min fotos was en’n tweedehandse stroopblik as beker.
Ontvang van Pieter uit Australie waar hy huidglik woon.
 
Gepraat van die stroopblik? Met die koshuis/dorp wedstryd op hande besluit Kobus Meyer en sy vriend Charl van den Berg daar moet ten minste iets op die spel wees met die wedstryd. Hulle maak toe die beker soos op die foto hieronder. Dit is genoem die “ Meyer en Van den Berg Rugby Trofee” soos geskrywe staan in die ’89 jaarblad. Dit het oor die jare  ‘n naam gekry wat te doen het met die stroopblik.

Die “ILLOVOCUP”.
Kyk mooi op die foto vir die naam van die stroop!  

 Die een span het in die skool se groen truie gespeel en die ander in blokkies truie wat die 1e span se oefentruie was. Kobus Meyer se kommentaar oor die wedstryd was dat daar nie genoeg tyd oor was vir die Koshuis om te wen nie. Ek vra toe het die koshuis toe verloor? Nee, was sy antwoord die wedstryd was gelykop toe die tyd verby is!! Die telling wat onthou kan word was 14 elk. 
 
Wie het in die begin jare gekwalifiseer om vir die twee spanne te speel?

1. Spelers wat nie aan die einde van die jaar vir een van die oop spanne gespeel het kon nie in die koshuis/dorp wedstryd speel nie.
2. 1e Span spelers moet vir die onderskeie spanne gekies word ongeag of hulle St 10 of 9 is. Dit was nie matrieks teen matrieks nie.
   

Met die sukses van die 1e span in die Direkteurs en Beeld trofee het dit later verander. Tot en met die einde van 2006 het die oop spanne se seisoen aan die einde van die 2e kwartaal geëindig toe Affies die laate keer aan die Beeld en Tuks reeks deelgeneem het. Die idee was dat die wedstryd so gou as moontlik na die laaste wedstryd van die seisoen gespeel moet word. Die 1e span spelers was dan nie beskikbaar vir die wedstryd nie. 1e Span spelers word nie toegelaat om te speel sedert 1992/93 (moet nog bevestig word). Dit klink of daar met verloop van jare veranderings aan die reel was t.o.v. sekere 1e span spelers wat wel gekwalifiseer het om te speel. Met my skrywe kon ek nog nie al die veranderings bevestig nie.
In 1990 het die wedstryd nie plaasgevind nie en in 1991 was dit die matrieks teen die st 9’s. Daarna het dit jaarliks plaasgevind tussen die koshuis en dorp buiten die laaste twee jaar.
Daar is min inligting oor historiese wedstryde beskikbaar naamlik spanfotos, aksiefotos en tellings in Jaarblaaie of Stroomop. Enige iemand wat inligting het wat betref tellings, fotos en wie mag speel kan my asseblief kontak by 083 564 5057 of johanenazelle@gmail.com